因為喺Pornhub教微積分而為人熟悉嘅張旭老師，最近遠赴美國邀請金髮AV女優「Lena Anderson」幫佢擦黑板，結果成功刷出新流量！佢仲話嚟緊會搵更多美女幫忙擦黑板添。

日前張老師喺YouTube上傳一條名為「台灣數學老師竟找了P站排名前十的女優幫他擦...」嘅短片，明顯見到教學環境唔同咗，黑板亦換成迷你白板，但都無阻張老師繼續春風化雨，熱心講解「x的x次方的x次方微分」。途中突然出現一位身穿白色背心、粉紫色迷你裙嘅金髮美女，將白板上嘅算式慢慢擦走，擦完仲坐咗喺梳化對住鏡頭食珍寶珠，眼神極為誘人，連攝影師都忍唔住要影實佢而唔係影張老師，呢一幕亦成為全條片最多人重播嘅地方。

據張老師介紹，呢位金髮美女係PornHub排名前600嘅AV女優，藝名叫Lena Anderson(又名Blaire Ivory)，仲講笑咁話今次合作非常愉快，因為「我們要她做什麼就做什麼，然後要她做幾次就做幾次！」當然啦，佢所指嘅係擦黑板呢個行為。除此之外，張老師亦喺FB表示下半年應該會啟動「板妹世界巡迴活動」，到訪唔同國家搵女優幫忙擦黑板。