奧斯卡金像獎向來被唔少演員視為職業生涯重要里程碑，甚或乎係終極目標，不過從演近50年嘅Samuel L. Jackson就冇咩興趣，情願拍攝Marvel、《Star Wars》等主流電影，都唔想刻意飾演有機會角逐奧斯卡嘅角色。

現年73歲，並喺上年榮獲奧斯卡終身成就獎嘅Samuel L. Jackson日前接受《Los Angeles Times》訪問，大談獲獎心得以及對奧斯卡嘅睇法：「我永遠唔會用奧斯卡嚟衡量自己係咪一個成功演員，我嘅成功標準取決於我是否幸福，我滿唔滿意自己所做嘅事。我唔想拍一部角逐奧斯卡嘅電影，就算有人同我講『你拍呢套電影，你會拎奧斯卡㗎！』我都會話『不了，多謝。』我情願扮演神盾局局長Nick Fury，或者手持光劍嘅Windu大師。」

另外，Samuel L. Jackson亦提到佢所演嘅角色令觀眾印象深刻：「我就係個種會俾人將台詞印上T-Shirt嘅演員，有啲演員雖然成世人都演緊戲，但就冇人講得出佢哋任何一句電影對白。大家會為咗睇我演得有幾瘋狂，又或者好奇我會講幾多次『Montherfxxker』而睇我嘅電影。」