由Amazon Prime製作嘅《魔戒》劇集《The Rings of Power》即將於本週五播出第一季最後一集，但目前坊間對於劇集嘅評價非常參差，唔少《魔戒》Fans對於劇集後續都不抱太大期望。近日《The Hollywood Reporter》就爆出當年托爾金遺產委員會決定開拍劇集時，HBO、Netflix、《Avengers》導演Russo brothers，《霍金：愛的方程式》導演Anthony McCarten其實都曾提交不同方案，當中甚至有人提案「《魔戒》版《Avengers》」。

卻說2017年時，托爾金遺產委員會透過官司從Warner Bros. 手上拎返《魔戒》劇集嘅拍攝權，隨即邀請各大平台提案及出價，以決定劇集最終花落誰家。鼎鼎大名嘅《魔戒》要拍劇，自然吸引到Netflix、HBO等平台參加提案。據《THR》引述消息人士指，當時HBO提議重新講述中土世界第三紀元嘅故事，基本上就即係重拍當年Peter Jackson執導嘅《魔戒》三部曲及《哈比人》三部曲，但HBO喎，當年拍緊《Game of Thrones》嘅HBO拍《魔戒》喎，諗下都興奮啦係咪？

不過當時托爾金遺產委員會主席，即托爾金個仔Christopher Tolkien就唔太鍾意Peter Jackson執導嘅電影，認為佢「挖空原著」，加上唔想重拍大家都熟悉嘅故事，所以最後HBO落選。

而另一有力競爭者，就係當時財大氣粗嘅Netflix。據知當年Netflix提議開拍多部聚焦於不同角色嘅《魔戒》劇集，例如甘道夫一套、亞拉岡一套，然後到某時某刻就將呢啲角色「集結」——冇錯，就係Marvel嘅拍攝模式。但據知呢個提案「嚇親委員會啲人」，所以哪怕Netflix出價最高——現時坊間流傳嘅2.5億美金，其實係Netflix嘅出價——委員會最後都係揀咗出價少幾千萬嘅Amazon。

咁Amazon又有咩吸引到委員會呢？據知當日提案時，Amazon其實冇準備確切嘅提案，但就願意確保劇集製作團隊中會有委員會嘅一席之地，最後就成為中選者。而Amazon中選之後，亦曾經搵過《Avengers》嘅導演Russo Brothers (提出要拍亞拉岡故事) 以及 Anthony McCarten (提出將《魔戒》拍成莎翁劇)，但最終就揀咗於荷里活幾乎寂寂無聞，但係非常熱愛《魔戒》系列、識用精靈語同班高層打招呼，以及願意探索書中從未影視化嘅第二紀元嘅J.D. Payne及Patrick McKay，結果就成為大家今日睇到嘅《The Rings of Power》啦。

資料來源：The Hollywood Reporter