由Keanu Reeves主演、改編自DC漫畫《Hellblazer》嘅《Constantine （魔間行者）》於今年9月宣布原班人馬開拍續集，雖然官方尚未公布具體開拍及上映日期，但好消息已令全球影迷引頸以待。

導演Francis Lawrence日前接受外媒《The Wrap》專訪時提到，當年拍《Constantine》嗰陣為咗遵循片商華納兄弟規則，即使片中含有暴力、血腥、粗口及性暗示等元素，都要盡量拍成PG-13（即13歲或以下人士觀看時需家長指引），然而電影最終都被美國電影協會評為R級（即17歲或者以下不得觀看）。

Francis Lawrence坦言，如果早知電影會評為R級，佢就唔會作出咁多妥協，拍得更恐怖及暴力，所以今次續集誓要拍成「真．R級」，並表示續集嘅John Constantine或者會更貼近原著漫畫性格，加入更多諷刺、憤世嫉俗嘅黑色幽默。