早喺PS5及Xbox Series X等新主機推出，大家發現佢哋嘅機能上同前作冇咩突破性分別時，就已經有人提出遊戲界嘅未來將會係「串流遊戲」，即係玩家唔需要再買主機 (或電腦)，只要有上到網嘅任何裝置就已經可以打機。而睇黎Xbox嘅開發商Microsoft就已經密鑼緊鼓迎接未來，因為據外媒報導，佢哋打算收購世界最大串流平台Netflix，以建構一個串流遊戲服務。

Microsoft近年不停用收購嘅方法建構自家遊戲王國。早於2014年佢哋就用25億美金收購咗《Minecraft》嘅開發公司Mojang，今年初又宣佈會用687億美金收購知名遊戲開發商Activision Blizzard，不過相關收購就因為有玩家以反壟斷提出反對，目前「卡關」中。

而今次收購Netflix嘅傳聞亦非空穴來風。首先作為全球最大串流服務平台，Netflix本身都有意進入串流遊戲市場，今年9月時更開始組建「Netflix Games Studio」開發自家遊戲。但整體黎講，佢哋目前都係處於「有串流冇遊戲」嘅狀態；另一邊廂，Microsoft就明顯係「有遊戲冇串流」，雙方合併就可以取長補短。同時兩間公司嘅關係亦比大家印象中更加緊密。早前Netflix推出有廣告嘅訂閱計劃時，就搵咗Microsoft做推廣伙伴，而Microsoft主席Brad Smith，亦於Netflix董事會中有一席之地。

據《Reuters》報導，雙方合作嘅最終目的，係希望建立一個「支援不同裝置嘅串流遊戲服務」，基本上就即係「打機版嘅Netflix」。而據推測，假若Microsoft真係提出收購Netflix，收購價可能高達1900億美金，不過對於目前市值1.8兆美金嘅Microsoft黎講，都唔係負擔唔到嘅數字。

資料來源：Reuters