《黑豹》男主角Chadwick Boseman於2020年因大腸癌不幸離世，《黑豹2：瓦干達萬歲》劇本經歷數次改寫，最終由妹妹Shuri繼承衣缽成為新任黑豹。最近導演Ryan Coogler及編劇Joe Robert Cole接受訪問時就透露，其實《黑豹 2》原定係講述T’Challa及兒子Toussaint之間嘅父子情...

導演Ryan Coogler及編劇Joe Robert Colea日前接受《The New York Times》訪問時透露，《黑豹 2》原定打算從父親嘅視角講述一個父子故事，事關第一集係由兒子角度出發講述父子故事。原版劇情入面，T’Challa成為一名爸爸，但因為「彈指事件」而被迫離開兒子長達5年時間。第一場戲係一段動畫，觀眾會聽到Nakia（T’Challa情人）問阿仔Toussaint：「話畀我聽你對爸爸有幾了解。」然後大家就會意識到Toussaint唔知自己爸爸係黑豹，同埋從來冇見過佢，而Nakia亦一早改嫁一名海地居民。然後畫面一轉，鏡頭回到所有人恢復身體嗰晚，T’Challa首次同阿仔見面。

其後劇情就跳到《復仇者聯盟：無限之戰》3年後，T’Challa及Nakia共同扶養Toussaint，講述父子兩人共度一個夏天（劇組更將電影代號命名為「Summer Break」），並喺Toussaint八歲生日嗰時為佢舉行一場儀式，一齊走進叢林探險，但後因為發生咗啲事，T’Challa冇辦法唔帶埋阿仔拯救世界。

另外，導演亦透露原定反派依舊係Namor，故事同樣圍繞Wakanda、Talocan、美國之間嘅三方衝突，唔知大家聽完會唔會覺得原版可能更好睇呢？