最近有位叫做「罗巍Cyberverse」嘅工程師，喺個人微博上分享一段手機遊戲Demo片段，表示團隊正開發一款第三人稱射擊遊戲，計劃後續會有10個英雄及10個關卡更新，同時向大家征集遊戲名字，結果引嚟網民瘋狂留言諷刺。

從Demo試玩片段可見，呢款手遊無論玩法、畫面、武器道具都神似任天堂著名遊戲《Splatoon》，同樣係玩漆彈塗色占地，角色亦可以潛入顏料，齋睇相嘅話仲以為任天堂係咪推出《Splatoon》手機版。可能因為抄得太足，就連中國網民都幫唔落「自己人」，紛紛留言諷刺「我覺得依託答辯（諧音:一坨大便）最好，你覺得呢？」、「原神2吧，宣傳呢就就走個黑紅路線吧」、「叫東施效顰」、「就叫謝謝你任天堂 簡潔明了又顯得很飲水思源 很有禮貌」、「斯普拉遁愛國版」。另外亦有網民表示任天堂最強法務部係時候要出動了！

然而「罗巍Cyberverse」就懶理各種諷刺，繼續發文交代遊戲開發最新動向，準備製作新場景、邀請網民加入封測等等，更Post咗一條片表示2012年Xbox上已經有一款漆彈塗色遊戲，疑似想澄清漆彈射擊遊戲呢個idea老早已經存在。但有趣嘅係，佢曾經就用過「 #噴射戰士3」及「#噴射戰士2」（《Splatoon》中國譯名）等Hashtag發文宣傳，唔知大家有咩睇法呢？​​