《水星的魔女》首季最終話「高達拍蕃茄」一幕震撼唔少影迷，並掀起網民熱烈討論，二創各種meme圖瘋傳。不過，有部份日本家長就認為呢一幕太過血腥暴力，唔應該被小朋友睇到，於是向當地放送倫理機構投訴。

(以下內容含劇透)

《水星的魔女》第一季最後一集，女主角蘇萊塔為營救米奧琳涅，駕駛風靈高達好似拍蚊咁一掌拍死敵人，瞬間鮮血四濺，殘肢甚至飛到米奧琳涅臉旁，嚇到佢當堂呆晒，但事後蘇萊塔竟然若無其事、滿臉笑容走出駕駛艙邀功，兩人極大反差令觀眾留下深刻印象，更衍生出一系列meme改圖。

然而，有日本家長就認為呢幕太過血腥暴力，早前向當地非政府組織「放送倫理、番組向上機構（簡稱 BPO）」投訴。根據最新會議文件顯示，有觀眾指出「用高達拍扁人類，鮮血四濺、斷肢橫飛嘅表現手法實屬不當」、「當時我同讀緊小學既小朋友一齊睇，我哋兩個都嚇到目瞪口呆」、「節目放映或預告都冇事先提醒會有殘酷畫面，呢種視覺表達方式確實唔太合適星期日下午5點播出」

BPO委員亦紛紛發表意見，表示雖然殘肢漂浮畫面有明顯將血液顏色調深，但仍然唔適合周日下午5點闔家時段觀賞。不過都有委員持反對意見，認為製作組已作出一定程度考慮，例如畫面冇直接顯示被拍扁嘅人體，飛濺嘅血液亦有作深色處理。

ガンダム「水星の魔女」、BPOに… pic.twitter.com/skbkKOAOsv

— オリちゃん???????? ˎˊ˗ (@oriii_chance) February 10, 2023

對於今次爭議，有網民就表示《水星的魔女》本來就唔係小童向作品，更以《鬼滅之刃》同《進擊的巨人》為例子，反問點解只有《水星的魔女》被點名批評。與此同時，亦有網民建議第二季可以移至深夜時間播放，減少爭議。

*非政府組織「放送倫理、番組向上機構（BPO）」由日本放送協會（NHK）及日本民間放送聯盟共同創立，以「確保節目放送的正當性以及提高放送倫理道德」為目的，監督廣播電視節目，職能類似香港嘅通訊事務管理局。雖然冇法律約束力，不過喺日本傳媒界有著極大影響力，一旦有人向BPO投訴，無論申訴是否成立都會被傳媒大肆報導，其直接後果可能會影響節目收視率。