隨住ChatGPT嘅興起，近月唔少人都開始探討人工智能嘅實際應用方法。而目前人工智能除咗可以同你傾下計、某程度上取代傳統搜尋引擎之外，另一最常見嘅就利用Stable Diffusion、Dall-E又或Midjourner等自動生成嘅圖片——例如大家應該見過嘅性感Cosplay圖片。而日本創作者「Rootport」亦由2月開始，利用自己創作嘅故事，再以Midjourney生成圖片，結合成漫畫《Cyberpunk桃太郎 (サイバーパンク桃太郎)》，並於今日推出首本單行本。而Rootport亦接受傳媒訪問，回應作品推出後引起嘅爭議。

圖片：Kuragebunch.com

Rootport以往曾以原作 (故事創作人) 身份，與不同漫畫家合作推出過《神と呼ばれたオタク 》等數本漫畫。而《Cyberpunk桃大郎》故事講述一名身懷大企業重要數據「KBY」嘅失憶少年，被送到一間由老婆婆經營嘅脫衣舞會，被婆婆取名為桃太郎後面對敵人嘅故事。Rootport由2月起開始創作故事，利用Midjourney生成適合圖片並結合成漫畫，再放於網上連載。而今日推出嘅就係修改過部份圖像後嘅首本單行本，並預計會公開埋Rootport嘅創作過程。

《Cyberpunk桃太郎》自開始網上連載後，就引起唔少爭議。不過準確而言，呢啲爭議並唔係針對《Cyberpunk桃太郎》，而係對於「AI自動生成照片算唔算創作」、「AI利用其他畫師嘅作品作為基底，生成出黎嘅圖片算唔算抄襲」等。而早前美國創作者Kris Kashtanova利用Midjourney創作嘅漫畫《Zarya of the Dawn》，被美國著作財產局 (US Copyright Office) 以「沒有人類創作元素」而否決申請。

✨????ついに発売!!????✨
本日3月9日、書籍版『サイバーパンク桃太郎』が発売されました!! 何卒よろしくお願いします!!

試し読みはこちらから→https://t.co/wBYajgvKwn#Midjourney #AIart #サイバーパンク桃太郎 #CyberpunkMomotaro #マンガが読めるハッシュタグ pic.twitter.com/0uPAIWnCX6

— Rootport???????????? (@rootport) March 8, 2023

對此，Rootport接受訪問就表示：「美國當局唔係否認所有AI生成圖片，只係認為Kris Kashtanova『對圖片改動太少』。」佢估計，雖然目前《Cyberpunk桃太郎》可以用「AI生成漫畫」黎做宣傳，但最快一年、最遲三年內，AI輔助創作就會普遍到「根本不值一提」。

佢提出，以漫畫創作者嘅角度睇AI，就如同一個傳統音樂家睇MIDI (電子音樂)一樣，「冇作曲家會話『有MIDI，人類就唔需要管弦樂隊』，又或者『有初音未來，就唔需要人類歌手』。」所以佢斷言，AI唔會取代漫畫家或插畫家，而係會令創作方式更多元，「對於本身具備創作能力嘅人，AI可以節省時間；對於本身冇創作能力嘅人，係一種新表達方式」。同時佢亦提出，傳統漫畫創作嘅「特色」之一就係超長工時，超辛苦作業 (文青按：大家睇下富奸條腰就略知一二)，而AI正正就係改善嘅方法之一，令創作者更集中於故事及趣味性之上，對於讀者而言其實係件好事。

資料來源：nlab.itmedia