日本江戶時代浮世繪大師葛飾北齋以《富嶽三十六景》及《北齋漫畫》等作品聞名於世，而當中最出名嘅作品就一定係《富嶽三十六景》中嘅《神奈川沖浪裏》，更啟發咗唔少「二次創作」。而近日日本LEGO達人三井淳平就發文，表示佢於2020年創作嘅LEGO版《神奈川沖浪裏》獲美國波士頓美術館邀請，參加於3月尾舉行嘅「北齋展」，屆時將與葛飾北齋真品一同展出。

ある日、米国のボストン美術館から突然メールが来て、

なんと、私のレゴ作品がボストン美術館で展示されることになりました。

3月26日から始まる「北斎展」で展示されます。現代アートとして本物の浮世絵と一緒に飾っていただけるようです。 pic.twitter.com/mWETQJ7OEg

— 三井淳平 / Jumpei Mitsui (@Jumpei_Mitsui) March 8, 2023

波士頓美術館舉行嘅「北齋展」，除咗會展出葛飾北齋嘅真品之外，更重要嘅想展示葛飾北齋作品對於其他藝術家，包括現代藝術家嘅影響及啟發，所以場內除咗有過百幅北齋真跡之外，更有超過200件由其老師、學生、競爭對手以至後世仰慕者創作嘅作品。而三井淳平嘅LEGO版《神奈川沖浪裏》就屬於「後世仰慕者」嘅部份。

圖片：MFABoston

現年36歲嘅三井淳平係一名東大畢業生，讀書時更於學校創立「LEGO學會」，後來得到LEGO官方認證，成為全球二十幾位LEGO達人 (LEGO Certified Professional) 之一。而佢於2020年時，透過Twitter公開LEGO版《神奈川沖浪裏》，以LEGO立體還原原作嘅洶湧海浪、被巨浪翻弄嘅漁船以及工人，乃至水平面遠處嘅富士山等。

三井淳平亦於Twitter表示，十幾年前開始創作LEGO作品時，都唔敢話自己造嘅係「藝術品」；但經過持續不斷嘅創作，加上今次得到波士頓藝術館「認證」，佢終於可以有自信咁自稱「藝術家」。

資料來源：PRTimes