Microsoft於去年1月宣佈會以687億美金收購開發出《Call of Duty》、《World of Warcraft》、《Diablo》系列遊戲嘅Activision Blizzardz，旋即遭到美國、歐盟、英國等相關機構展開反壟斷調查。而近日英國競爭與市場管理局 (CMA) 就率先公開審查報告，表示會反對收購案。

CMA早前曾撤回收購會影響主機市場嘅觀點，不過近日公佈嘅審查結果中，就表示收購案會對雲端遊戲市場造成重大影響。報告指出Microsoft嘅Windows係最主流嘅個人電腦作業系列，同時微軟又擁有最強大嘅雲端基礎系統，結合成一個其他競爭者難以取代嘅強大優勢。目前Microsoft已佔據英國雲端遊戲市場嘅60-70%。而雖然目前Activision Blizzard旗下嘅遊戲都冇提供雲端遊戲服務，但「微軟有強烈動機去做」，所以萬一真係成功收購，微軟就能夠於雲端市場上排除其他競爭者。

值得一提嘅係，早前Microsoft曾於包括NVIDIA嘅GeForce NOW在內嘅多個雲端遊戲平台簽下十年協議，試圖解決CMA提出嘅問題。但CMA方面就表示呢啲協議具有「高度不確定性」，而且最終只會成為Game Pass嘅增值服務，而Microsoft只需加價就能夠抵銷玩家得到嘅好處。

由於英國、歐盟及美國係分開進行反壟斷調查，所以英國方面反對收購，唔代表歐盟同美國都會反對，所以目前未能定奪Microsoft是否收購失敗。不過《Associated Press》就引述一名前美國聯邦貿易委員會成員，指英國唔係一個細到Microsoft可以放棄嘅市場，即使能夠完成收購，但失去英國市場似乎都係冇咩意義，所以「等同一個全球決定」。

資料來源：Reuters、AP