中國影視平台「愛奇藝」今日舉行「世界大會」，並公佈咗2023至2024年嘅劇集、電影片單，其中就赫然有聲稱改編自日本作家田中芳樹嘅著名科幻長編小說《銀河英雄傳說》嘅同名劇集，令唔少中國科幻小說Fans都頗為興奮。不過，田中芳樹嘅日本代表人「安達裕章」事後就喺Twitter表示，佢對於此事毫不知情，瞬間引起日本網民熱話。

據中國愛奇藝目前公佈嘅宣傳海報，可以見到大大隻字寫住「銀河英雄傳說」，仲寫明「原著 田中芳樹」，而編劇人選就包括《三體》電視劇嘅編劇「田良良」。消息被日本媒體報導後，安達裕章就立即於Twitter轉發報導，並表示「呢單嘢我都係第一次聽，冇人黎搵過我喎…」

安達裕章為田中芳樹等多位日本作家嘅代表兼秘書，換言之如果有人想利用《銀河英雄傳說》嘅版權，理應係要與其接洽。而佢公開講「冇人搵過我」，就引起大量日本網民質疑中國愛奇藝係咪打算明刀明槍拍攝翻版。

不過，安達裕章亦有提到，過去佢哋的確曾經將《銀河英雄傳說》嘅真人版版權賣過畀某間公司，而據佢所知嗰間公司已經「唔存在」。佢亦承認聽聞過有另一間公司從「某公司」接收咗版權，但就冇人真正聯絡過佢。所以佢於Twitter公開呼籲「接手公司」用電話又好，電郵又好，總之就係快啲聯絡佢搞清楚件事。

同時佢亦呼籲網民們要冷靜，等佢搞清楚之後就會再同大家匯報。