任天堂大作《薩爾達傳說 王國之淚》今日正式發售，而媒體嘅首波評價亦已出爐。目前遊戲於Metacritic上嘅媒體評分高達96分，更被譽為前作《曠野之息》以後、Switch平台上最好玩嘅遊戲。但唯獨有個外媒唱反調，表示「慶幸有人只畀六分」，究竟係咩一回事呢？

圖片：Metacritic

卻說Metacritic昨日公開《王國之淚》嘅媒體評分，其中《IGN》、英國《Guardian》、《Telegraph》等知名媒體都畀出100分滿分，另外絕大多數媒體評分都處於90分以上，唯獨《Gfinity》畀出僅僅合格嘅60分，並表示「如果你冇玩過2017年嘅《曠野之息》，咁呢隻Game就唔啱你玩。」平心而論，大家未必同意呢個論點，但又的確能夠理解。

不過本文重點就不在於《Gfinity》嘅評分，而係有另一個遊戲媒體《Kotaku》報導咗《Gfinity》畀60分嘅消息，並大字標題寫住「慶幸有人畀60分」。《Kotaku》於文中表示，過去如果有人對任天堂遊戲畀出8.8/10分，就已經成為「醜聞」，但其實「無任何遊戲係客觀地完美，每個人都有不同嘅口味同能力，覺得遊戲可以所有人都覺得好或壞已經係1995年嘅廢話」，佢哋亦表示「所有人都讚一隻Game其實係壞事，對大眾玩家而言係有傷害」，並呼籲大家要去聆聽其他人嘅體驗。

圖片：Kotaku

不過《Kotaku》呢番言論就於Twitter上被口誅筆伐，事因就係2021年時，《Kotaku》公開報導任天堂遊戲《Metroid Dread》可以於Switch模擬器上玩到，對任天堂黎講就即係宣傳盜版，結果就《Kotaku》被列入任天堂嘅黑名單，早前佢哋亦於《王國之淚》發售前就報導「流出」遊戲內容，睇黎到任天堂嘅關係頗為對立。

所以唔少網民都於《Kotaku》嘅帖文下留言，嘲諷佢哋只係因為被任天堂列入黑名單而報仇，亦有人指整篇報導只係笑話，而且再一次提醒大家遊戲媒體有幾可笑。唔知大家又點睇呢？

資料來源：Kotaku