上星期我哋同大家報導過中國愛奇藝宣佈會拍真人版《銀河英雄傳說》，而日本負責人「安達裕章」於Twitter上指「冇人話過我知」，導致唔少日本網民都懷疑愛奇藝係「盜版翻拍」。點知過咗個週末風向就突然逆轉。安達裕章不單止刪去日前嘅帖文，更發文向中國Fans們道歉。

安達裕章新帖文 (節錄)

これにつきましては、私の間違いです。お詫び致します。
中国とは、原作小説「銀河英雄伝説」の出版をはじめ、アニメの配信などさまざまなお付き合いがあり、どの会社さんとも気持ちの良いお付き合いをさせて頂いております。今後とも良い関係が続けられたらと思います。

— 安達裕章 (@adachi_hiro) May 11, 2023

卻說上週四發文表示「不知情」後，安達裕章於週五再次發文，表示由於尚未收到任何消息，所以會先將帖文刪除。並表示因為日前嘅帖文中用上「嗰個國家真係難明」一句，而令部份中國Fans們感到憤怒，安達裕章表示自己只係針對有關嘅製作公司及播放平台，並唔係針對「整個國家」，並就此向中國Fans們道歉。

另外佢亦表示《銀》嘅小說及動畫都有於中國發行，過去佢同中國公司嘅合作亦相當愉快，佢希望未來都能夠保持呢種關係。並再次呼籲中國Fans們聯絡真人版《銀》劇集嘅製作方，希望佢哋能夠與原作者 (即係安達裕章本人) 聯絡。

安達裕章表示之前佢哋亦曾經與中國 (另一間公司) 傾過真人版劇集嘅事，當時佢提出過唔少意見，雙方嘅合作亦相當和諧、快樂。最後佢表示，雖然唔知道今次呢個真人版劇集嘅結局如何，但佢非常期待《銀》於任何國家有任何新作品出現，並指希望到最後大家能夠笑住討論呢個「驚喜」。