已播出一段時間嘅《鬼滅之刃 刀匠村篇》日前於中國平台正式上架，當然少不免遭到各種和諧同刪減，結果戀柱變成包住浴巾浸溫泉，流血鏡頭就直接用黑色遮住。

由於審查問題，已經播到第九集嘅《鬼滅之刃 刀匠村篇》最近先喺中國平台Bilibili正式上架，結果各種和諧引起大量網民不滿，紛紛留言諷刺。其中最為明顯嘅就係戀柱浸溫泉一幕，原版係裸體浸浴，但中國版就變成包住浴巾浸浴，而戀柱嘅標誌性低胸裝亦收返條事業線。

除此之外，劇中嘅血腥鏡頭亦被和諧，例如第一集開頭「上弦三」猗窩座一掌打爆「上弦二」童磨嗰頭，流血部份就直接變成一達黑色，就連炭治郎噴鼻血畫面亦被和諧，變到乜都冇噴到。激到中國網民大呻「不如你索性刪咗浸溫泉嗰幕啦」、「傻嘅先會睇中國版！」、「畀錢買平台會員仲要睇刪減版...」