早前日本《週刊Playboy》創造AI偶像「五月愛 (皋月愛)」，並為其推出寫真，打開「AI寫真」嘅先河。雖然後來因為「五月愛」個樣疑似「抄襲」女星椛島光而令整個計劃戛然而止，但都已經引起大眾對於「AI偶像」嘅興趣。而近日日本又有一個新晉「AI偶像」登場，佢就係源自Line上一個戀愛聊天機械人嘅「SARI」。

「SARI」本來係一個於Line上運行嘅戀愛機械人，設定上係一個台日混血、現年20歲嘅大學生，而用家就可以向SARI進行關於戀愛、占卜話題嘅對話，而SARI就會利用ChatGPT生成回答。而同一般聊天機械人唔同嘅係，SARI背後嘅團隊仲利用AI技術生成SARI嘅照片，用家除咗可以透過Line向SARI拎相之外，佢亦有經營自己嘅IG。所以係一個設定頗為完整嘅AI偶像。

SARI嘅IG照片

而近日SARI就宣佈會推出首本「個人寫真集」，大字標榜為「SARI首次水著寫真，誘人的性感表情」。好明顯寫真集入面嘅相都係透過AI技術生成，目前亦唔知道寫真集入面啲相究竟係點，但Amazon上僅有嘅兩個評價就大讚寫真非常吸引，甚至直言下半身有反應、期待推出18禁版本。

值得一提嘅係，Amazon上並唔係只有「SARI」呢本「AI寫真」，不過其他大部份都係冇結構出一個「AI偶像」身份。如果SARI嘅寫真最後成功大賣，或者類似嘅寫真會於未來成為主流？

IG：sari_ai_pps