如果你有留意外國嘅八卦新聞，就會發現耐唔耐就會有啲女性KOL指責其他男客人「偷睇」佢哋做Gym，當中部份指責固然屬實，但亦有部份情況只係該名女性KOL太敏感所致。而近日一位英國男KOL就於節目中分享自己早前被指偷睇女客人做Gym，最終被趕出健身室嘅事，有趣嘅係，呢名男KOL係一名視障人士，而且被誤會當刻已經立即澄清自己嘅視力狀況，但女客人依然唔接受。

現年21歲嘅英國人Toby Addison，係一名於TikTok上擁有超過25萬追蹤者嘅網紅。雖然驟眼睇佢同一般人冇咩分別，甚至可以話有啲靚仔，但其實無論係佢嘅用戶名「blindtobes」，又或佢嘅個人簡介中都寫到明佢係一名視障人士，佢製作嘅內容主要亦係分享佢如果喺睇唔到嘢嘅情況下生活、運動。

而日前Toby登上一個Podcast節目時，就透露今年初曾經因為被誤會偷睇女客人做Gym而被趕出健身室。據佢憶述，當時佢於健身室內自己做緊Gym，突然聽到有個女性走埋黎講：「你睇得好開心下嘛？你點解要係咁望住我？唔好咁變態啦！」」Toby表示一開始佢唔知道個女客人係同自己講緊嘢，所以當佢確認對方指佢偷睇後感到相當驚訝：「好明顯我成日都唔知自己對眼究竟『望』緊去邊，我只係望住前面，而嗰次好唔好彩地有個女人做緊運動。」

Toby除咗係一個KOL，更係一名視障足球員

當時Toby立即向該名女客人出示摺起咗嘅盲人杖，並表示自己睇唔到嘢，但「佢完全冇理過我，叫我收聲，然後就去搵健身室職員趕我走。」

Toby亦曾於2月時於TikTok分享呢件事，當時有網民回應指，因為Toby睇落去的確唔太似一個視障人士，所以該名女士會誤會都係情有可原。Toby表示一開始嘅誤會的確唔可以怪嗰位女性，但當佢拎出盲人枚表示自己係視障人士並向對方道歉後，對方依然唔接受並向職員要求趕佢出去，咁就實在係太過份。佢亦表示，因為一小部份人嘅不禮貌行為，而令女性們於健身室感到不舒服或憂係令人傷心，但大家對於身體障礙嘅無知亦同樣令人傷心。

資料來源：New York Post