雖然喺好多人眼中Daniel Radcliffe已等同哈利波特，但佢本人就表示無意客串HBO《哈利波特》劇集，並送上祝福。

最近「哈利仔」Daniel Radcliffe接受外媒《ComicBook.com》訪問，期間首度開腔回應客串HBO《哈利波特》劇集傳聞，Daniel表示：「據我所知，佢哋（製作方）打算重啟呢部作品，我相信無論邊位製作人操刀，都會想呈現出個人風格，而唔係諗辦法將『舊哈利』回歸，所以我絕對唔會尋找任何方式客串。但我祝福佢哋一切好運，非常期待今次薪火相傳，但我唔認為我需要親自傳遞火炬。」

據了解，HBO《哈利波特》劇集預計會製作7季，每季對應原著每本小說，由全新卡司出演，而原作者J.K. Rowling亦會擔任劇集監製，並承諾會「忠於原著」。考慮到HBO拍劇向來慢工出細貨，預計今次劇集版《哈利波特》將會係橫跨近10年嘅長期計劃，目前官方尚未公布演員陣容及播出日期。