近日荷里活演員工會加入編劇工會早前發起嘅罷工，導致整個荷里活上至宣傳、拍攝、下至籌備、簽約通通停擺，而且目前仲未見到工會與片方之間嘅談判有任何進展，罷工似乎都仲會維持一段時間。而據外媒報道，有《MI7》上映中、作為直接「受害者」之一的Tom Cruise，原來都曾獲邀進入談判之中，但其部分發言就比其他與會者稱為「令人不舒服」。

據《The Hollywood Reporter》報導，Tom Cruise曾獲邀出席演員工會 (SAG-AFTRA) 與製片方聯盟 (AMPTP) 於6月時嘅談判，係少數能夠直接參與談判嘅大牌明星。Tom Cruise於談判中提出兩項觀點，首先係促請片方聯盟接受演員工會提出，針對特技專業人士待遇嘅提議，但佢同時亦懇請演員工會放寬罷工條件，容許演員參與電影宣傳工作。

作為近代動作片巨星，又親自上陣參演多個誇張特技場面，Tom Cruise對特技人待遇有所關注可以話係非常合理；而考慮到談判當時《MI7》正在宣傳當中，佢要求公會容許演員參與宣傳工作，似乎有情有可原。不過據知Tom Cruise在談判中表示，呢個提議並非單為《MI7》本身，而係為咗支持目前處於「脆弱」環境之中嘅院線，並表示宣傳工作對演員們同樣重要。但有與會者事後表示，對於Tom Cruise並非百分百站在演員工會一方感到「不舒服」。

但無論Tom Cruise喺6月談判時講過啲咩都好，結論就係演員工會與製片人聯盟傾唔掂數，最終導致目前嘅大罷工。要解決事情，始終都要靠雙方繼續談判。

資料來源：The Hollywood Reporter