採用零宣傳策略嘅《你想活出怎樣的人生》上周五於日本正式上畫，短短4日勁收21.4億日元票房（約1.21億港元），打破當年《千與千尋》及《風起了》紀錄，可謂相當成功。

據日媒報導，採用零傳宣策略，冇預告、冇劇照、冇故事大綱就直接上映嘅《你想活出怎樣的人生》，開畫短短4日就吸引近135萬人觀看，票房大收21.4億日元，打破2001年《千與千尋》（首4天票房19.4億）紀錄，若然同宮崎駿上一部作品《風起了》比較，《你》嘅開畫票房更係《風》嘅150%，業界預計電影本土票房最終將突破100億日元。

隨住電影上映，電影聲優陣容亦正式公開，分別邀請到山時聰真、菅田將暉、木村拓哉（特別演出）、柴咲幸、愛繆、木村佳乃、國村隼、小林薫、火野正平等人聲演，而片尾曲「地球儀 Spinning Globe」則由米津玄師領唱。

（圖片截自：yahoo映画）

《你想活出怎樣的人生》改編自日本作家吉野源三郎1937年同名小說，原著講述一位高中生喺舅父嘅引導下探索友情、貧富、欺凌、勇氣等課題，從而帶出「人之所以為人的價值」以及「生而為人應有的態度」。根據觀眾劇透，宮崎駿嘅電影版加入更多奇幻色彩，有部分情節更令人聯想起《龍貓》及《千與千尋》。目前電影評價可謂相當兩極，鍾意嘅人覺得好震撼同感動，而唔鍾意嘅人就覺得故事冗長沉悶、太過難明，未知香港幾時上畫。