相信各位讀者對於《龍珠》嘅劇情應該非常熟悉，亦一定會知悟空、比達等人所屬嘅「撒亞人」，曾經係一個殺人無數嘅戰鬥民族。但近日日本網絡就掀起一陣熱議，原來有人睇漫畫時，以為撒亞人係一個絕不濫殺無辜嘅善良民族，原因就係唔空與菲利之間嘅呢段對話。

これを「罪もない者を殺さなかったから滅びた」と読む人間がいると聞いて頭を抱える pic.twitter.com/4phSaiGSfL

— とが (@toga_uma) July 7, 2023

卻說《龍珠》娜美星篇中，菲利殺害無限後激發悟空變身成超級撒亞人，悟空指責菲利「一個接一個地濫殺無辜」後將其暴打一頓。菲利起身後為自己辯解，說到：「竟然說得那麼偉大…你們撒亞人沒殺過無辜的人嗎？」然後悟空回答：「所以滅亡了…」

而早前日本Twitter用戶「とが @toga_uma」就表示，原來有人以為悟空嘅回答，係表示「撒亞人沒有濫殺無辜，所以滅亡了」，令佢非常頭痛。帖文隨即引起大量網民討論，有人認為理解錯咗嘅人，根本無認真睇過漫畫，甚至係閱讀能力有問題；但亦有人指出菲利與悟空嘅對話，的確可以有兩種解釋，一時間眾說紛芸。

文化傳訊嘅香港中文版

亦有網民心水清地指出，如何理解呢兩句對白，非常取決於讀者是否事先知道撒亞人為戰鬥民族，如果知道，就會好理所當然地將菲利嘅提問視為反問，咁悟空嘅回答就自然係「(因為有濫殺無辜) 所以滅亡了…」；但如果事前唔知道「戰鬥民族」嘅設定，菲利嘅提問可以理解成設問，咁悟空嘅回答就可以係「(就係因為無濫殺無辜) 所以滅亡了…」。

估唔到睇《龍珠》都可以同語法、閱讀理解有關呢？所以，邊個話睇漫畫對小朋友無益？