超人氣新世代韓國女團NewJeans全新專輯「Get Up」將於21日正式問世，官方喺今日凌晨就率先公開主打歌《Cool With You》MV，搵嚟《魷魚遊戲》女星鄭好娟主演及影帝梁朝偉客串，同時亦係偉仔從影多年嚟首度出演Kpop MV，超型白髮造型火速引起網民熱議。

NewJeans新歌《Cool With You》MV分拆成side A及side B兩個版本呈現，故事參照希臘神話「丘比特與普塞克」，side A講述鄭好娟（丘比特）與一位黑人男士（普塞克）邂逅嘅愛情故事，而side B則出現驚人轉折，梁朝以超型白髮造型現身拆散鴛鴦，令黑人男士愛上其他女人，並於馬路上與鄭好娟對望，單靠幾個眼神已經展示出影帝級強大演技，兩段MV推出短短12個鐘已分別吸引322萬及276萬次觀看。

被譽為「怪物新人」嘅新世代女團NewJeans於去年8月正式出道，成員平均年齡只有17歲，以青春氣息迷盡全球Fans。出道唔夠一年已橫掃多個頒獎典禮大獎，其中著名歌曲《Ditto》更打進「Billboard Hot 100」，成為繼Wonder Girls、BTS、BLACKPINK、TWICE後第5個打進該榜嘅韓國團體。