由Niantic開發嘅《Pokemon Go》曾經盛極一時，當時幾乎全條街嘅人都耷低頭捉緊小精靈，所以當《Pokemon Sleep》於2019年宣布開發時，唔少玩家都非常期待能夠瞓住玩Pokemon。不過《Pokemon Sleep》嘅開發就一再延期，直到本月初先正式發佈，Pokemon熱潮亦早已從高峰滑落，令《Pokemon Sleep》嘅討論度極大減。近日開發團隊接受《Fami通》訪問時，就透露開發遊戲嘅一大難處係試玩，因為每日只可以「玩」一次。

《Pokemon Sleep》開發團隊

圖片：Fami通

翻睇報導，《Pokemon Sleep》嘅開發最早於2019年被傳媒曝光，當時預計2020年就會發佈，但結果就要等到三年後先正式見街，如果由構想開始計，更係用咗近5年半時間，開發期可謂不尋常地長。而近日開發者團隊就接受日本遊戲雜誌《Fami通》嘅訪問，當中除咗提到開發原意、構想過程、玩法介紹之外，亦提到《Pokemon Sleep》大幅延期嘅原因。

其中監督中畑虎也表示，《Pokemon Sleep》之所以延期，係因為團隊要同時開發硬體設備《Pokemon Go Plus+》，而推出硬體嘅難度比起只造遊戲程式更加費時，結果就令到可以與Pokemon Go Plus+聯動嘅《Pokemon Sleep》亦延期。

而首席工程師宮川佳祐隨後亦補充：「試玩亦變得相當困難，除咗真係瞓覺之外就冇其他辦法，基本上每日都只可以試玩一次。雖然我哋可以創建虛假睡眠資料去做測試，但考慮到真正瞓覺時可能會出現意想唔到嘅事情，所以儘可能都會真係瞓覺去試。」

而報導出街後，有日本網民就表示「可以瞓住覺賺錢真係開心」，亦有人對此表示理解：「請多個人都只係每日試玩一次，聽落又真係幾煩嘅」。

資料來源：Fami通