隨住Netflix真人版《ONE PIECE》將於8月31日正式播出，官方今日率先曝光「草帽海賊團」5位早期成員個人海報，分別係「路飛」Iñaki Godoy、「卓洛」新田真劍佑、「娜美」Emily Rudd、「烏索普」Jacob Gibson以及「山治」Taz Skylar，而且五張海報仲可以合併成一張完整背景圖。

Netflix真人版《ONE PIECE》由原作者尾田榮一郎親自監製，第一季共有8集，預計劇情將會聚焦原著漫畫「東海篇」，講述路飛童年時受著名海賊「紅髮」撒古斯啟蒙，自細就立志成為海賊王，長大後便出海追夢，其後相繼邀請「海賊獵人」卓洛、「航海士」娜美、「狙擊手」烏索普以及「廚師」山治入團，朝著偉大航道進發。