由尾田榮一郎親自監修嘅《One Piece》Netflix真人版劇集早於上週開播，而與事前Fans普遍認為「慘遭真人化」不同，真人版《One Piece》目前似乎叫好又叫座，Rotten Tomatoes上嘅觀眾評分高達96%，網上亦出現大量相關討論。而尾田榮一郎近日接受《New York Times》訪問時就提到，其實佢本身都唔想拍真人版，直到睇完周星馳嘅《少林足球》先令佢產生信心。

圖片：Netflix

尾田接受《New York Times》訪問時指，其實過去咁多年黎，佢曾經收過無數個將《One Piece》拍成真人影視作品嘅提案，但佢通通都冇接受到。當中第一個原因係佢覺得漫畫作品本身就唔適合改編成電影，「我認為去畫一部適合翻拍做真人版嘅漫畫無任何意義」。直到佢睇咗星爺嘅《少林足球》，發現電影就如「將一個漫畫世界帶到現實」，再加上近年嘅特效技術發展，先令佢改變主意，答應Netflix嘅真人化提案。

圖片：Netflix

另一邊廂，過往日本動漫「慘遭真人化」嘅成績，其實尾田自己都有眼見。所以為咗確保《One Piece》唔會成為下一個受害者，尾田本人就笑稱自己於整個製作過程都有如一隻「看門狗」一樣：「過往有咁多部漫畫改編真人版作品，但日本冇人可以提出一部係成功嘅。《One Piece》嘅Fans，以及冇睇過漫畫嘅新觀眾，係咪真係可以接受？好在Netflix亦同意唔會推出一部我自己唔滿意嘅作品，所以我睇哂劇本、畀哂意見，好似一隻看門狗一樣，確保佢哋正確運用所有材料。」

尾田亦大讚製作團隊嘅高度配合，「就算已經煞咗科，但如果有啲場面我覺得唔夠好，佢哋都願意重拍。亦有試過係有啲對白我一開始覺得唔太似路飛，但睇完現場拍攝後，又會覺得『如果係Inaki Godoy做嘅路飛就合理啦』。」

資料來源：Hollywood Reporter