荷里活名導演Quentin Tarantino早於2014年就曾經講過，自己拍完10部長片就會退休 (兩集《Kill Bill》合計一部)，其第十部執導作品《The Movie Critic》亦於今年3月公佈拍攝計劃。而近日網上就有多則傳聞，表示Quentin Tarantino有意搵返成名作《Pulp Fiction》嘅四大主角於新電影中回歸或客串，相信Fans們睇到個名單就相當興奮。

HOT RUMOR via THE HOT MIC: I hear Tarantino is saving a role in his final film THE MOVIE CRITIC for two of his former leading men. Here's one of them... pic.twitter.com/clrRSLf5Jn

— Jeff Sneider (@TheInSneider) September 18, 2023

話說過去曾多次報導電影準確情報嘅荷里活電影記者Jeff Sneider (@TheInSneider) 日前於X (Twitter) 上發文，表示佢收到消息指「Tarantino會於《The Movie Critic》中，為兩位佢曾經合作過主角預留角色，以下是其中一個…」並配上John Travolta於《Pulp Fiction》中著名嘅「迷茫攤手」Meme圖。換言之按佢嘅情報，John Travolta會出演《The Movie Critic》。

而網民亦紛紛猜測Jeff Sneider提到嘅「另一名主角」究竟係邊個。其中有人估係曾多次與Tarantino合作、早前由另一資深電影記者Daniel Richtman爆出會參演《The Movie Critic》嘅Samuel L. Jackson，但Jeff Sneider就指Samuel L. Jackson會參演「已經係Old News」，話自己講緊嘅係另一個演員，同時再加碼爆料某位曾經同Tarantino合作過嘅女星亦會加入《The Movie Critic》。

圖片：IMDB

由於8月時英國《Daily Express》曾報導，Tarantino有意搵返同樣有份出演《Pulp Fiction》、近年因為患上失語症而息影嘅Bruce Willis於新電影中客串一角，所以唔少人認為Jeff Sneider提到嘅另一名男演員就係Bruce Willis，最後一名女演員亦順理成章地估計係《Pulp Fiction》女主角Uma Thurman。換言之假若上述傳聞屬實，《Pulp Fictionz》四大主角都有望於Tarantino最後一部作品中回歸。

據報《The Movie Critic》嘅選角已經全部完成，只係因為目前荷里活大罷工而未能正式公佈。

資料來源：Jeff Sneider、Daily Express、World of Reel