日本日清經常會推出啲明明冇咩用，實際上大家亦唔需要，但就唔知點解令人好想要嘅週邊產品。例如今年3月時，佢哋就公佈咗「配料床具」嘅概念圖，而最新公佈真係會發售嘅，就係「日清杯麵專用量杯」，仲一次過送9個杯麵過你添！

以前投稿してバズった「カップヌードル専用計量カップ」がカップヌードルとのセットでまさかの商品化！必要最低限の水でカップヌードルのお湯を沸かせる生活が手に入ります。

▼オンラインストアhttps://t.co/NWEfAikfHG
▼Amazonhttps://t.co/fH5WSGtR6R
▼ヨドバシ.comhttps://t.co/uLQwOOE9tJ https://t.co/LjmIMUtM6u pic.twitter.com/qDnCwrHrs6

— カップヌードル (@cupnoodle_jp) September 25, 2023

話說今年4月時，日清於社交媒體上公佈咗呢個「日清杯麵專用量杯」，其主要賣點除咗係有同杯麵包裝如出一轍嘅花紋及Logo之外，更重要係杯身側面分別刻有日清普通杯麵、加大版杯麵以及迷你版杯麵所需嘅熱水量。換言之只要有咗呢個量杯，你就可以極準確地量度出不同杯麵需要嘅熱水量，既唔使擔心落得太少水個麵唔熟，又唔使驚太多水會影響杯麵嘅味道，仲順手為節約用水出一分力，係咪好想要呢？

而近日日清就宣佈真係會將呢個量杯商品化，不過就只限套裝發售。套裝售價為3630 Yen，即約HK$190，當中除咗個杯之外，仲會包括原味、海鮮、咖哩三個味道嘅大中小三個杯麵總共九個，等大家可以親身試下用個量杯淥出最正宗嘅日清味道。不過撰文之時套裝就已經火速售罄，大家想要嘅話要睇下佢補唔補貨啦！

資料來源：日清