由兩屆奧斯卡男配角Mahershala Ali主演嘅新版《Blade》原定於今年夏天開始拍攝，但因為遇上荷里活大罷工而延期。而隨住編劇罷工完結、演員罷工又似乎見到解決曙光，關於《Blade》嘅各種傳聞亦蜂擁而至。近日就先有《Variety》爆料《Blade》過去曾5次更換編劇，甚至一度有意將主角換成女性；後有導演Yann Demange確認新《Blade》會係限制級 (R) 電影，令其成為MCU中繼《Deadpool 3》後第二部限制級電影。

《Green Book》中的Mahershala Ali

日前外國電影傳媒《Variety》做咗個專題報導，以超長篇幅討論MCU未來前景，而當中就有提到《Blade》嘅發展過程。卻說2000年代初由Wesley Snipes主演嘅三部《Blade》完結後，Marvel於2012年將《Blade》版權收回並開始籌備新版。但你睇過咗十年都仲係影都冇，就知佢哋嘅籌備工作相當唔順利。據《Variety》報導，歷年黎《Blade》總共換過5次編劇，劇本亦多次由頭寫起，其中某個版本更將Blade寫成電影嘅第四角色，而主角就換成一位女性。

報導出街後，唔少影迷都擔心新版《Blade》又會成為政治正確產物，而曾於荷里活罷工前參與撰寫《Blade》編劇嘅Michael Starrbury近日就於X (Twitter) 發文闢謠，指佢「從未見到有女性做主角，Blade成第四角色」嘅版本，而佢參與嘅版本中有99%戲份都係圍繞Blade本人。但佢亦指出於佢離開團隊後「可能可以發生好多事」，所以最終成品目前仍係未知之數。

2002年上映，由Wesley Snipes主演嘅《Blade 2》

另外新版《Blade》導演Yann Demange日前接受《Deadline》訪問時，就提到MCU准許佢將電影拍成限制級 (R級)，並表示：「我們會玩得很開心，因為Mahershla Ali是個非常有深度的演員。我很高興能夠展示他的無情與粗獷……他有一種尊嚴與正直，但亦有一種隱藏的凶狠，我想將其釋放，呈演於銀幕上。」

換言之，新《Blade》將會係《Deadpool 3》後，MCU第二套R級電影。有評論指出MCU (或Disney) 准許《Blade》拍成R級，除咗係要跟從原作漫畫風格之外，亦代表佢哋漸漸放寬對主創們嘅限制，給予更多創作空間，同時亦唔介意冒險放棄傳統嘅「闔家歡」市場。似乎就係面對近年MCU作品頹勢不至嘅應對手段之一。

資料來源：Variety、Deadline