唔通CAPCOM都有睇過《超級學校霸王》，遲下會唔會出埋春美個老母？

近日CAPCOM公開《街頭霸王6》18位首發角色全新造型預告「Outfit 3」，有眼利嘅網民就發現阿Ken嘅新造型同《超級學校霸王》入面嘅鄭伊健撞晒樣，同樣身穿紅色皮褸、黑色皮手套、牛仔褲配皮靴，加埋一把金色長髮，不禁令人懷疑CAPCOM係咪「致敬」返呢套經典港產片。

《超級學校霸王》由王晶編劇及執導，人物設計明抄當時紅爆全球嘅街機遊戲《街頭霸王》，並邀請到四大天王中嘅劉德華，張學友以及郭富城參演，故事講述張衛健所飾演嘅余鐵雄大法官正審理橫行省港澳嘅犯罪大王「將軍」，其手下乘坐時光機回到50年前，企圖改變少年余鐵雄嘅思想，令佢喺50年後判將軍無罪釋放。未來特區得知此事後，便派出3位飛龍特警回到50年前保護少年余鐵雄，過程中搞出唔少笑料。