《Elden Ring》嘅DLC《Shadow of the Erdtree》早前正式公佈預告咁發售日期，而相信一眾「褪色者」睇完條預告後都充滿問題。日前外國遊戲媒體《IGN》就同《Elden Ring》製作人宮崎英高進行咗個專訪，當中宮崎英高除咗進一步透露《Shadow of the Erdree》嘅故事、世界觀等重要情報之外，甚至透露出未來會開發更多《Elden Ring》DLC嘅可能性。

宮崎英高首先提到，預告一開始出現、位於蒙格溫王朝嘅「米凱拉隻手及繭」，就係玩家們觸發DLC故事、進入「幽影之地（Land of Shadow）」嘅地方。從設定上而言，幽影之地係被「黃金樹的陰影」所籠罩（就如本傳中黃金樹照耀大地嘅相反）、「技術上與交界地佔據同一空間，但因為目前唔可以講嘅故事原因而從物理上被斷開連接」嘅土地。其大小會同本傳中嘅「寧姆格福」地區差唔多，而且同樣有廣闊嘅土地，大型地下城以及中小型遺跡。

而故事方面，宮崎英高就指出除咗大家都估到嘅米凱拉之外，女王瑪莉卡亦係重要人物之一。「米凱拉過去進入幽影之地，而玩家們會追蹤他的步伐，嘗試了解當地發生過甚麼事。而另一主軸則是女王瑪莉卡以及她在幽影之地做過的事，是甚麼令到米凱格要跟隨她進入幽影之地。」

宮崎英高亦提到於預告中非常搶眼嘅紅髮Boss「梅瑟莫（Messmer）」，並指佢係整個DLC嘅重要人物。佢指預告中曾出現梅瑟莫坐於「王座」上嘅畫面，而嗰張王座，其實係本傳中「惡兆王 蒙葛特」Boss房中，理應屬於一眾半神嘅王座同款，換言之梅瑟莫應該與一眾半神擁有同等地位，但就因為未知原因而被除名，反而去咗幽影之地。

難度方面，宮崎英高就指出DLC中會有一個難度上「被調較成類似瑪蓮妮亞」嘅Boss，但就並非主線Boss，換言之只係為想挑戰自己嘅玩家而設。

最後，當被問題《Elden Ring》未來仲會唔會再出DLC時，宮崎英高表示雖然目前冇開發DLC 2嘅計劃，但「我唔想話《Elden Ring》已經全部完結…我唔希望否定呢個可能性。未來我們或者會有新想法。」

資料來源：IGN