雖然我一直都覺得近年嘅M記薯條冇細個嗰陣咁好吃，但無可否認嘅係，佢啱啱炸起時嗰陣香氣的確令人食指大動。而日本麥當勞似乎就想好好利用呢個優勢，早前宣佈會推出「薯條味」香水，令網民紛紛懷疑「愚人節係3月架咩？」

圖片：McDonaldsJapan

日本麥當勞上週於官方（Twitter）發文，表示自己整咗支「聞起來像薯條的香水」，而附圖中除咗一支經典薯條盒形狀嘅香水外，仲有兩支外表以日本麥當勞Shake Shake薯條紙袋為藍本嘅「Shake Shake粉」香水，分別為「梅子海苔鹽」及「蒜味黑胡椒」。

由於張圖整得似層層、日本各大企業又有「不務正業」嘅習慣，，所以即使「薯條香水」聽落去非常荒謬，但日本網民都唔敢一下子否定。大部份人都表示「愚人節4月先到喎」、「依家3月咋喎」，「薯條味聞得耐其實係臭嘅」，反正就成功引起話題，帖文總共有超過2,000萬次觀看、13萬讚好。

圖片：McDonaldsJapan

事實上，今次只係日本麥當勞為咗兩隻新口味「Shake Shake薯條粉」（就係「梅子海苔鹽」及「蒜味黑胡椒」）而作出嘅宣傳。不過考慮去年日本麥當勞聲稱要出「薯條香薰」引起哄動，最後亦真係出咗個「薯條型加濕器」曲線找數，或者未來「薯條香水」都真係有望實體化？