作為日本最「不務正業」嘅企業（好可能沒有「之一」），日清除咗出杯麵之外，仲經常推出啲可以話「九唔搭八」、勉強同杯麵有些少關係嘅奇怪產品，例如電話座、床單、保溫壺等等。而最近佢哋就同提倡大家於屋企種盤裁嘅日本網站「Protoleaf」合作，推出「杯麵種菜」組合。

圖片：カップヌードル @cupnoodle_jp

話說月初時，日清日本官方X（Twitter）上傳咗一張相，只見相中有多個杯麵樣嘅花盤，而日清就留言「用杯麵種草 笑笑笑笑笑」，並於留言處留下連結。進入連結後就會去到Protoleaf嘅網站，並顯示日清同Protoleaf聯乘推出、售價為1,430Yen（約HK$70）嘅「杯麵花盤加泥土」組合。個花盤當然係用咗日清杯麵嘅樣式，但Logo就由「Cup Noodle」改成「Cup Noo土le」，巧合地連中文都食埋字；而組合中送嘅泥土就刻意仿傚杯麵內嘅「謎肉」整成立方體，稱為「謎土」。

據Protoleaf官網上嘅教學，個組合買返屋企後，要先打開「杯麵蓋」，再拆去「謎土」包裝，然後加水浸軟謎土，再將謎土捏碎鋪好，就可以種下自己想要嘅植物。官方建議大家自己種菜或者種蔥，方便為杯麵加料。

資料來源：Protoleaf