打牌素來被視為「大人活動」，但據日本《朝日電視台》報導，近來日本學童就掀起一股「打牌熱」，家長們紛紛送小朋友去兒童麻將學校學打牌，而小朋友亦打得有模有樣。小朋友表示受職業麻將聯盟比賽，或者以打牌為主題嘅漫畫所啟發；而麻將學校負責人則表示打牌有助提升學童智力。唔知各位香港家長又會唔會畀小朋友試試佢？

圖片：朝日電視台

《朝日電視台》於本月初訪問咗一間於日本全國有超過140間分校嘅麻將學院。其負責人「鈴木響」表示，位於東京都品川區大井町嘅分校學生數目，於疫情後升咗1.5倍；原本放咗12張檯、可以容納48名學生嘅學校，最終坐咗66人。而從記者所見，小朋友們唔單止動作有板有眼，仲對日麻規則及術語非常熟悉。

日本寫真女星「岡田紗佳」就係M League選手之一

圖片：sayaka_okada

報導表示，自從日本職業麻將聯盟比賽「M League」出現，並有電視及網上轉播之後，日本大眾對於麻將嘅觀感就大幅改變，由以往嘅「賭博」變成依家嘅「腦力運動」，家長亦唔介意同小朋友一同觀戰。有小朋友就向記者表示自己未來希望成為M League選手。同一時間，由於大眾對麻將觀感改變，坊間亦出現「衍生產品」，例如有小朋友就表示自己係睇咗以麻將為主題嘅少女漫畫《碰之道 (ぽんのみち)》先對麻將產生興趣。

而據負責人「鈴木響」表示，目前已有研究證實打牌對學童智力發展有正面影響，所以希望麻將能夠成為乾淨、健全嘅頭腦運動。而想打牌技術變好，就要不停練習。

資料來源：朝日電視台