來自動畫《魔神英雄傳》嘅龍神丸雖然深入民心，但平心而論佢又矮又橫嘅「正方形」身材唔太符合傳統機械人審美之餘，亦令Cosplay龍神丸變成一個幾乎不可能嘅任務，因為根本無法還原比例之餘又塞到個人入去。不過近日一位日本Cosplayer就完成咗呢個創舉，唔單止整出完美還原龍神丸嘅服裝，仲要識行識走識舉手、能夠跟大隊參加巡遊。

ナルトンさん(@naltonz )の龍神丸見れました！すげぇ！動いとる！ pic.twitter.com/50flp0hmFH

— Hymn (@rebmasi_pal) May 12, 2024

話說事隔五年，日本東京日本橋商業區再次舉辦「日本橋街道慶典」，並一與以往包含Cosplay展示及巡遊活動。而日本Cosplayer「nalton@ナルトン （@naltonz）」就用咗幾個月時間，整出一套龍神丸服裝參加。

從「nalton@ナルトン」嘅X（Twitter）可見，其實佢早於8年前就已經整過一套龍神丸裝，不過隨後就放喺倉庫，直到今年《魔神英雄傳》迎來35週年，佢先於2月時再拎出黎著。可惜經過8年後服裝本身就已經有損壞，而且佢覺得當年做得唔夠靚，所以2月尾開始就重新製作新嘅龍神丸服裝。

8年前嘅龍神丸裝

新龍神丸裝製作過程

而為咗要更準確地還原龍神丸，所以佢多個部件佢都重新設計過。例如頭部駕駛艙位置換上紅色透明膠片、眼部加入綠色LED燈；為咗配合龍神丸嘅超橫身體，佢亦一改以往將套衫直接著上身嘅設計，改為以金屬為骨架，以機關控制簡易手部動作，龍神丸兩隻腳亦唔再係著喺佢自己對腳上，改為固定設計，佢本人就身穿黑衣揹起整個骨架，並從龍神丸兩雙腳之間伸出雙腿提供「動力」。成果就係早前「日本橋街道慶典」中，佢以超級驚艷、還原度極高嘅龍神丸服裝再次現身，獲得觀眾一致讚好，仲影咗好多靚相添！

資料來源：https://x.com/naltonz