Sony發行嘅服務型遊戲《星鳴特攻》因為人設、遊戲性、定價等各種問題，上月底上市後最高峰只有不足700人同時在線，而且負評鋪天蓋地而來，結果營運不足兩個星期就宣佈關服兼退款，外界估計Sony投入嘅兩億美金血本無歸。但所謂低處未算低，近日有《星》嘅開發人員匿名爆料，指出《星》嘅總開發成本其實高達4億美金！而且團隊內部嘅「有毒正能量」文化抗拒一切批評，導致遊戲與玩家完全脫節。

卻說前《IGN》編輯Colin Moriarty近日於其Podcast節目中爆料，指某位曾經參與開發《星》嘅人主動接觸佢，並透露更多關於《星》嘅詳情。首先，《星》嘅總開發成本其實唔係坊間一直傳嘅2億美金，而係4億。事實上自Firework Studios於2018年開始開發遊戲，到2023年第一季Sony正式收購整個工作室之前，《星》就已經用咗2億美金，但當時整個遊戲嘅狀況仍然差到難以想像，就連玩家選角、配對以進入比賽嘅整個系統，以及販售遊戲內商品等嘅商店、賺錢系統都係完全未開發。所以Sony先再追加2億美金，其中一大部份係畀錢將部份工作判出去畀第三方團隊處理，希望遊戲可以達到最起碼可以拎出去賣 (所謂Minimum viable product)嘅水平。

更重要嘅係，由於Sony於收購之前就已經有同Firework Studios合作，所以一開始嗰2億可能已經有Sony份。再加上追加嘅2億以及維持開發團隊每個月需要嘅「百萬計美元」，以及收購Firework Studios嘅資金，換言之《星》唔單止係Sony蝕最多錢嘅遊戲，仲係除正處於開發階段嘅遊戲之外，Sony有史以來投資最多錢嘅遊戲。而最後係一蚊都收唔返，簡而言之就真係「蝕到PK」。

Colin Moriarty繼續引述知情人士指出，Sony之所以會投資咁多錢，係因為《星》於開發階段被視為「Playstation的未來」，內部以「Sony的《Star Wars》」來形容遊戲，認為遊戲會「不停地被重溫」，亦係點解Sony會畀錢將《星》列入Amazon動畫《Secret Level》之中嘅原因。

而有咁多錢都可以整到隻Game咁爛嘅原因——順帶一提，《星》嘅內部開發名稱非常諷刺地叫「Chaos（混亂）」——就係因為團隊內部「有一個有毒正能量文化」，亦即即使團體內部都不唔可以講任何關於《星》嘅壞話，甚至係提出改善意見都唔得。Colin Moriarty以「Hermen Hulst（Fireworks Studio總裁）的孩子」來形容遊戲。換言之，《星》嘅失敗似乎能歸咎於Sony與Firework Studios高層們嘅過份自信。