《Variety》記者Clayton Davis於上週奧斯卡金像獎投票截止日時撰文，指出往年記者都會於截止日前後聯絡相熟「選民」，從而探知當年嘅投票風向。不過今年因為加州受山火肆虐，令記者們於聯絡選民時有所顧忌，反而係選民們主動聯絡記者，噓寒問暖後討論起投票事宜。據此，Clayton Davis整理出今屆奧斯卡嘅九大風向，以下就會挑出當中數個同為大家分享，詳細就可以去參閱Clayton Davis嘅原文。

《A Complete Unknown》

《Wicked》

據Clayton Davis指出，縱然一眾奧斯卡選民都係業內專業人士，但人非草木，始終會被現實生活嘅各種事件影響。而近來嘅加州山火唔單止威脅到唔少選民嘅人身安全，亦影響到整體社會氣氛，令唔少選民傾向選擇節奏輕快、開心嘅電影，例如Timothée Chalamet主演嘅Bob Dylan傳記電影《A Complete Unknown》，或者Cynthia Erivo及Ariana Grande主演、改編自同名音樂劇嘅《Wicked》。而選民又好可能只會將票投畀自己睇過嘅電影，所以呢類電影嘅得票或者會比以前高。

但提到《Wicked》，就必須要提到選民嘅另一風向「類型騙案（Category Fraud）」。所謂「類型騙案」其實係指演員於某部電影中明明就係「主角」戲份，但就選擇報名「配角」類獎項，以增加自己嘅獲獎機率，又或避免分散同戲另一「主角」嘅票源。而報名最佳女配角嘅Ariana Grande就係今屆最顯眼嘅例子。Clayton Davis指出唔少選民雖然鍾意Ariana Grande嘅演出，但對於電影為佢報名參加女配角又感到不滿，故有可能影響Ariana Grande嘅得票。

《The Brutalist》

另外，時間亦係影響選民投票嘅因素。每年嘅金球獎之所以被稱為「奧斯卡風向標」，就係因為唔少時間不多嘅選民係睇完金球獎結果，先決定去搵有提名或有獎攞嘅電影黎睇，於是金球獎成績好嘅電影，於奧斯卡嘅表現亦傾向較好。但今年較為特別嘅，雖然由A24發行、Brady Corbet執導、Adrien Brody主演嘅《The Brutalist》於金球獎上奪得最佳劇情片、最佳導演及最佳男主角三個大獎，但由於電影長達三個半鐘，而且劇情非常沉重，唔少奧斯卡選民都表示自己根本冇睇過、又或冇睇完，於是又可能影響《The Brutalist》嘅提名、獲獎機率。

而且選民嘅個人喜好及情緒亦有可能影響佢哋嘅投票意向。《Jurior No.2》被視為92歲嘅Clint Eastwood人生最後一部作品，更成為美國國家評論協會選出嘅2024年十大電影之一，但其實與Clint Eastwood合作多年嘅Warner Bros.一開始並不睇好電影，仲打算直接放喺串流平台Max就算，結果引來媒體批評，Warner Bros.先安排電影正式於院線上映。Clayton Davis就指出唔少選民都有為咗幫Clint Eastwood出氣、「向Warner Bros.舉中指」而選擇投票予《Jurior No.2》。

《Jurior No.2》

至於其他有關今屆奧斯卡頒獎禮嘅風向，可以去參閱Clayton Davis嘅原文。美國電影藝術與科學學會將於1月23日公佈提名名單，而頒獎禮則會於3月10日舉行。

資料來源：Variety