由迪士尼出品嘅真人版《白雪公主》，自公布選角以嚟就一直備受關注及批評，其中飾演Snow White嘅Rachel Zegler更公開批評原版動畫「過時」，以及王子跟踪公主嘅行為非常奇怪，令原版Fans更加反感。隨住電影將於下月上映，最近Rachel Zegler接受訪問時一改舊有囂張態度，將負面聲音解讀為影迷對原版動畫嘅「熱情」，仲話能夠參與一部令人如此熱情嘅作品，實在感到非常榮幸。

Rachel Zegler曾在「D23 Expo 2022發布會」公開批評原版《白雪公主》過時、王子跟踪公主非常奇怪。

最近Rachel Zegler接受墨西哥版《Vogue》專訪，被問到如何看待電影批評聲浪時，佢今次就收起以往嘅氣焰，表示：「我將大家對呢套電影嘅情緒解讀為熱情（passion），能夠參與一個令咁多人充滿熱情嘅作品，實在係一種榮幸。我哋未必永遠都同身邊嘅人意見一致，但我哋能夠做嘅就係盡力而為。」另外，當問到想觀眾從電影中獲得什麼時，Rachel Zegler就表示迪士尼喺1937年原版同與新一代真人版之間，搵到一個美麗而又微妙嘅平衡，觀眾將會喺真人版中睇到白雪公主嘅精髓——在逆境中依然善良，以及對萬物嘅愛與善良，並認為呢一點對觀眾非常重要。

真人版《白雪公主》由《500 Days of Summer（心跳500天）》導演Marc Webb執導，《Lady Bird（不得鳥小姐）》編劇Greta Gerwig及Erin Cressida Wilson共同撰寫劇本。Rachel Zegler扮演白雪公主、Gal Gadot扮演王后、Andrew Burnap則扮演原創男主角Jonathan，預計3月20日在香港正式上映。