受惠於當年電視台播過，加上Denise Richards嘅超凡美貌，相信唔少人都會記得「去外星打蟲族外星人」嘅1997年經典科幻電影《Starship Troopers》（港譯：星河戰隊）。但你未必知嘅，係電影其實擁有一個頗為龐大嘅IP，除咗電影有拍續集之外，仲有動畫以及去年都仲出緊嘅遊戲。而近日有傳聞指出Sony（再次）打算重啟整個系列，為IP煥發第二春。

圖片：IMDB

1997年嘅《Starship Troopers》由拍過《RoboCop》（鐵甲威龍）、《Basic Instinct》（本能）以及《Hollow Man》（透明人魔）等科幻驚悚片嘅名導Paul Verhoeven執導，並改編自美國小說家Robert A. Heinlein於1959年推出，獲得「雨果獎」嘅同名小說。

不過電影當年上映時嘅評價並不出色，唔少人都認為電影將主角性格變得平面化，亦失去原著中對於個人及社會關係嘅探討；以1.05億美金預算獲得1.21億票房亦係明顯蝕錢。但後來隨伊拉克戰爭爆發、加上Paul Verhoeven透露自己係刻意描寫並諷刺戰爭宣傳而令口碑調頭向上，甚至被媒體評為90年代百大佳片之一。

圖片：IMDB

而電影本身亦的確擁有一班死忠Fans，至令到後續能推出多部續集，以及動畫、遊戲。而據《Screen Geek》報導，其實發行商Sony過去一直都有意重啟系列，特別係拍一個相比97年版電影更貼近原著小說嘅版本，並寄望電影能夠於商業上比原版更成功。

但值得一提嘅係，《Starship Troopers》過去亦多次傳出重啟，就咁做下資料搜集都搵到兩次。第一次係2010年時《Fast & Furious》系列監製Neal H. Moritz就話想重啟系列，並指會「更忠於原作」；2021年時電影主角演員Casper Van Dien亦向媒體透露，Sony曾經打算開拍劇集版，但因為疫情而無疾而終。至於今次「又重啟」究竟能唔能成事呢？大家就只能期待後續發展啦。

資料來源：Screen Geeks