五年前由Naughty Dog製作嘅《最後生還者 第II章》(The Last of Us Part II)，深獲遊戲媒體好評成為10/10分「神作」，賣出過千萬套並橫掃超過300個年度遊戲大獎(GOTY)。如此輝煌嘅成績，理應乘勝追擊推出續作啦係咪？不過，最近Naughty Dog總裁Neil Druckmann就叫玩家唔使寄望會有更多續集，暗示呢個系列似乎正式完結。

Neil Druckmann日前接受外媒《Variety》專訪，內容主要討論《最後生還者》真人版劇集，但記者喺臨尾順便問埋《最後生還者》會否推出第三集遊戲。Neil Druckmann先嘆一口氣，然後表示：「我就知道你會問呢個問題，我覺我只可以話，唔好指望會有更多《最後生還者》續作，呢個系列可能到此為止。」

不過，Neil Druckmann係咪真係就此心息呢？事關佢喺去年2月曾表示，呢幾年自己一直思考緊第三集遊戲主題，雖然未有完整故事，但已經有初步想法，點解隔咗一年後會突然轉軚，咁就不得而知喇。可以確定嘅係，目前Naughty Dog正全力開發一部太空科幻新作《Intergalactic: The Heretic Prophet》，所以都唔會有時間去研究《最後生還者3》，又或者因為咁，Neil Druckmann先叫大家唔使寄望。

Naughty Dog正全力開發太空科幻新作《Intergalactic: The Heretic Prophet》

若然Fans們想再欣賞更多《最後生還者》作品，目前只能靠真人版電視劇，第二季預計4月13日正式播出。劇集主創Craig Mazin曾透露，如果繼續有人投資而觀眾又想睇，佢希望可以拍到第三甚至第四季。