日本LEGO神人「セイレイ（X@seirei526）」又完成新作！繼上次挑戰縮小作品體積之後，今次佢要挑戰嘅係「超高可動性」，以改變過往作品雖然好睇但幾乎完全郁唔到嘅缺點！而佢嘅最終成品，就係以下呢個高50cm至62cm（進入HyperMode）、全身擁有88個關節嘅超高可動G高達！

據佢近日於X上公開嘅完成圖以及過程紀錄，今次與之前作品最大分別在於大量用上LEGO Technic系列嘅零件，以追求最大嘅可動性。結果作品單單一隻手就已經有24個可動關節，其中肘關節活動性更加超大，手掌幾乎可以摸到同一邊膊頭。另外膝部同樣用上超大活動性設計，令作品可以單膝跪下，而且裝甲更會隨活動而移動補位，甚至連腳趾部份都可以單獨移動。美足不作嘅係膝頭摺到最盡之時，膝關節嘅空間太大，所以大腿及小腿分得太開，但單論活動性而言已經非常驚人。

既然全身有眾多高活動關節，咁呢隻G高達自然亦可以重現原作中進入「HyperMode」、使出爆熱神掌嘅夠場面。而當背後嘅六隻翼打開之後，機體全高更去到62cm，配合不同甫士可謂逼力過人，難怪留言唔少人都叫佢快啲量產化啦！