由麥浚龍自編自導，雲集金城武、劉青雲、梁家輝、古天樂等巨星嘅《風林火山》終於有新消息！Juno尋晚喺IG驚喜宣布，電影成功入圍康城影展午夜放映單元，亦係今屆唯一入圍嘅華語片，並同步公開15秒前導預告，睇嚟距離正式上映應該唔遠啦。

康城影展嘅「午夜展映單元」係專為動作片、懸疑驚慄片及恐怖片而設，旨在讓電影人喺國際舞台展示具有獨特藝術風格及影響力嘅作品。去年《九龍城寨之圍城》就入圍過呢個單元，如今《風林火山》再次為香港影壇爭光，令人振奮。

View this post on Instagram

A post shared by juno mak (@juno_mak)

Juno得悉電影入圍後，亦透過Instagram發文感謝每一位評審：「謝謝每一位喜歡《風林火山》的評審們。相信每部電影都有屬於它的命運，實在找不到一個更合適的時間/地點去響起屬於這部電影的前奏曲。背負的情緒太多，感動的話語不知從何說起，還是埋首繼續忙。再一次衷心的感謝。在天的，願你們都分享得到這份榮耀。」

據了解，《風林火山》其實早於2018年已經煞科，但足足等咗7年都未有上映日期，甚至畀影迷笑稱係「都市傳說」。故事講述某富商在爆炸事件中喪生，牽引出毒販同執法者之間嘅角力鬥爭。與此同時，富商嘅繼承人在幕後製造混亂，聲稱要創造一個「沒有毒品嘅世界」。

View this post on Instagram

A post shared by juno mak (@juno_mak)

從最新預告可見，第一個鏡頭似乎就係傳說中「落雪銅鑼灣」，鮮紅色嘅血水流向水渠，其後金城武、古天樂、劉青雲、高圓圓及梁家輝等人逐一登場，片尾更有一個高空鏡頭，捕捉到銅鑼灣發生大爆炸嘅一刻，場面震撼。希望快啲有正式上映消息啦。