近排幾乎日日落雨，每次出街又要拎遮又要濕腳真係令人煩躁。不過如果你擁有Bandai新出嘅幾款「高達盾雨傘」，或者你就會期待落雨，等你可以出去「曬」下你把新遮啦！

據日本「Gundam.info」網站報導，Bandai近日推出兩個系列共五款「高達盾雨傘」，其中第一個系列以元祖《高達》中出現嘅機體為主題，當中除咗以各自機體主色為賣點嘅老虎、渣古、以及馬沙專用渣古款外，最搶眼嘅就係元祖高達RX-78-2款，事關佢成把遮都係參考高達嘅盾而製成，拎住佢就好似拎住高達個盾一樣。

而雨傘嘅特別形狀，除咗係為咗還原高達盾之外，其實都有實際用處。資料顯示把遮最長處達126cm，從產品圖中亦可以見到把遮可以由頭遮到落大脾，完美咁保護你個背脊又或背囊。

至於另一個系列就以《高達Seed Freedom》為主題，目前只有一款雨傘，就係攻擊自由鋼彈貳式嘅激光盾。大小方面與上面嘅元祖高達款一樣，但就用上半透明物料以還原激光盾嘅視覺效果。

上述所有款式嘅官方售價都係6,930Yen（約HK$375），並附送遮套。

資料來源：Gundam.info