最近Scarlett Johansson接受雜誌《Vanity Fair》專訪，談及在Marvel電影宇宙嘅工作經歷時，佢仍然對《復仇者聯盟4》未能入圍奧斯卡「最佳影片」等主要獎項耿耿於懷。另外，佢亦再一次強調雖然懷念Marvel舊戰友，但自己唔會回歸MCU再演黑寡婦。

為宣傳首部執導電影《Eleanor the Great》同將於今年夏季上映嘅《侏羅紀世界：重生》，Scarlett Johansson日前接受外媒《Vanity Fair》專訪，期間佢就點名批評奧斯卡，表示唔明白2019年MCU大作《復仇者聯盟4：終局之戰》，點解會冇份角逐最佳電影等主要獎項，僅僅獲得「最佳視覺效果」一個提名：「呢部電影點解冇入圍最佳電影？呢部電影簡直係不可能任務，但最後成功拍到出嚟，而且佢仲係影史上最賣座嘅電影之一。」順帶一提，成個MCU截至目前只有《黑豹》係入圍過奧斯卡最佳影片提名。

對Scarlett Johansson嚟講，《復仇者聯盟4》可謂意義重大，因為佢所飾演嘅角色「黑寡婦」係呢部電影迎來結局，為拯救宇宙而壯烈犧牲。至於被問到會否重返MCU時，Scarlett Johansson就表示佢嘅角色故事已圓滿結束，拒絕回歸：「真係好難想像要用咩方式回歸，呢個角色先會有意義同埋講得通。雖然我好掛住我嘅Marvel戰友，好希望同佢哋永遠一齊，但黑寡婦嘅故事已經完結。我唔想破壞呢個結局，呢一點對Fans嚟講亦好重要。」