以Rey為主角嘅《星球大戰10》（暫名：New Jedi Order）目前正積極開發中，雖然演員陣容同具體劇情尚未公布，但Mark Hamill最近已率先表態，自己唔再回歸再演Luke Skywalker，並建議盧卡斯影業應放下舊有角色，專注年輕一代。

最近Mark Hamill為宣傳新作《The Life of Chuck》接受外媒《ComicBook》訪問，被問到會否以絕地英靈形式回歸《星球大戰10》時。佢就表示自己嘅時代已經過去，盧卡斯影業應該將焦點放喺年輕一代：「我好感激George Lucas當年畀機會我參與呢個項目，喺嗰個了不起眼嘅年代，George將《星際大戰》稱為『史上最昂貴嘅低成本電影』。我哋從來冇諗過呢部作品會發展成一個長期系列，並成為流行文化嘅一部分。但我覺得，我嘅時代已經過去。我好感激呢段經歷，並真心認為佢哋應該專注未來，以及所有新角色。」

除此之外，Mark Hamill仲講笑咁提到另一個原因：「我喺《Star Wars VIII :The Last Jedi》消失嗰陣，只係留低咗件袍。我無理由會以一個裸體嘅絕地英靈現身，係咪先。」指緊嘅係Luke力盡而死、肉體消失得返件袍嗰幕。不過，事實上佢之後有喺《Star Wars IX :The Rise of Skywalker》以絕地英靈身份回歸，而且係有著衫，所以佢呢番說話只係講下笑。

目前《New Jedi Order》嘅資訊非常少，只知道由Sharmeen Obaid-Chinoy執導，George Nolf負責撰寫劇本，故事設定在《The Rise of Skywalker》15年後，講述Rey重建Jedi武士團。