由Ben Stiller主演嘅冒險喜劇《翻生侏羅館（Night at the Museum）》系列，距離第三集、亦即係最後一集已經有11年歷史。最近有消息指，呢個人氣系列正在籌備重啟，同樣以博物館為背景，但會講述一個全新故事。

據外媒《Deadline》報導，由《翻生侏羅館》三部曲導演Shawn Levy創辦嘅製作公司21 Laps正在「重新構思（Reimagining）」呢個系列，並已經聘請《狂玩嘢時速（Stuber）》編劇Tripper Clancy撰寫劇本。雖然劇情尚未公開，但消息指新作會繼續以博物館為舞台，講述一個全新故事，並引入全新角色。暫時都未知前三集主演Ben Stiller會否回歸，但既然係「全新故事」，佢回歸嘅機會似乎唔大，可能最多只係客串一下。

《翻生侏羅館》講述一個剛離婚嘅老豆Larry Daley（Ben Stiller 飾）喺一間自然歷史博物館擔任夜間保安，然而每當夜幕降臨，館內所有展品都全數「翻生」，搞出連串笑料，當中更有唔少著名影星參演，包括已故演員Robin Williams飾演羅斯福總統、Owen Wilson飾演西部牛仔、Rami Malek飾演古埃及法老等等。該系列第一集在2006年推出後大受歡迎，之後分別在2009年及2014年推出續集，而整個故事亦都喺2014年第三集正式完結。直到2022年先再推出一部動畫續集《Night at the Museum: Kahmunrah Rises Again》，點知而家直頭打算重啟 ，唔知大家又點睇呢？