《The Conjuring》系列最終章《The Conjuring: Last Rites（詭屋驚凶實錄4：最後的儀式）》在上周於全球各地陸續上映，開畫短短三日已在全球狂收1.94億美元票房，更成為影史上開畫成績最好嘅恐怖片。

據票房統計網站《Box Office Mojo》資料，《The Conjuring: Last Rites》在上周五於北美市場正式上映，首周末三日票房遠超預期狂收8,400萬美元，而海外市場更加強勁，斬獲1.1億美元，全球首周末票房合計高達1.94億美元！呢個成績仲打破咗同樣由華納兄弟出品、2017年《It（小丑回魂）》所創下嘅1.9億美元紀錄，成為恐怖片開畫票房嘅新霸主。據了解，電影製作成本僅5,500萬美元，以現時嘅票房表現可以話係穩賺不賠，唔知片商會唔會因為咁而考慮再推續集或者外傳呢？

《The Conjuring: Last Rites》由系列第三集《The Devil Made Me Do It》、《The Nun2（詭修女2）》導演Michael Chaves執導，溫子仁則繼續擔任監製。故事背景設定在1986年，即亦係上集事件嘅五年後，當時艾德因為心臟病發，夫婦兩人原本已計劃退休唔再驅魔，不過一單全新恐怖案件出現，迫使兩人重出江湖再次對抗惡靈。

而呢單案件，就係現實中華倫夫婦處理過嘅著名案例「Smurl haunting」，當年Janet同Jack Smurl搬到賓夕法尼亞州West Pittston鎮一棟雙層住宅後，全家人飽受惡靈騷擾，包括每晚搖佢哋張床、發出巨大怪聲及臭味、將狗狗掉到牆上、推佢哋個女落樓梯，甚至對家庭成員進行性侵，案件在當年引起極大迴響，成為華倫夫婦職業生涯中其中一個最棘手嘅挑戰。