小島秀夫在小島工作室成立10周年紀念活動「Beyond The Strand」上，正式公開全新恐怖遊戲《OD》前導預告。雖然只有短短三分鐘，但已經令人感到毛骨悚然，仲有一種好似當年《P.T.》Demo嘅既熟悉感！

《OD》採用Epric Games旗下嘅Unreal Engine 5遊戲引擎開發，並邀請到《It（小丑回魂）》系列女星Sophia Lillis、《Euphoria（毒癮女孩）》男星Hunter Schafer，以及《紅色警戒 2》經典角色「尤里」演員Udo Kier參與演出。

從預告可見，由Sophia Lillis飾演嘅角色以第一身視角，推開一扇門進入一間詭異房間，並慢慢行近窗邊一個放滿蠟燭嘅木箱，然後拎出火柴將其逐一點燃，當中包括嬰兒形狀、小女孩頭顱形狀嘅蠟燭。點蠟燭期間，主角身後不斷傳嚟恐怖嘅敲門聲同BB喊聲，嚇到佢手震跌咗好幾次火柴。期後，背景傳嚟大門被推開嘅聲音，視角亦從第一人稱轉到影住主角正面嘅大頭突寫鏡頭，一個模糊嘅身影伴隨住沙沙聲慢慢行近，最後用雙手捉住主角個頭。恐怖氛圍令人不寒而慄，真係睇到起晒雞皮。

雖然遊戲暫時未公開劇情、玩法以及具體推出日期，但小島秀夫率先強調呢款遊戲會相當驚嚇，仲警告玩家可能會嚇到「瀨尿」！一眾恐怖遊戲迷，準備好未？