由鬼才導演Paul Thomas Anderson執導，Leonardo DiCaprio主演嘅《One Battle After Another（一戰再戰）》雖然贏盡口碑，甚至被睇好有望衝擊來年奧斯卡，全球票房亦有1.4億美元進帳，但由於製作成本高昂，預計最終可能令片商華納兄弟大蝕1億美元。

據外媒《Variety》報導，雖然《One Battle After Another》被譽為一代傑作，深受荷里活電影人及影評人喜愛，而且對於一部原創、R級、片長近三小時嘅電影嚟講，1.4億美元全球票房已經係相當唔錯嘅成績。不過，由於電影製作成本高達1.3億美元，又使咗7,000萬美元宣傳，加上Leonardo DiCaprio會取得票房收入部份分紅，有熟知市場嘅片商高層就估計華納兄弟將蝕本1億美元。

對於叫好不叫座情況，美國票務平台Fandango分析師Shawn Robbins就認為，呢類高評價電影因為未能在觀眾間掀起「FOMO（Fear of Missing Out, 驚錯過）」心態，難以吸引更多觀眾入場。加上觀眾消費習慣改變，更傾向等電影上架到串流平台先睇，特別係無超級英雄、兇猛恐龍或Christopher Nolan式大場面嘅作品。與此同時，好多片商為咗搶佔串流市場，將院線上映時間由以往90日大幅縮短，有啲電影甚至上映幾星期就登上串流平台。

然而票房失利消息傳出後，華納兄弟發言人就駁斥有關說法，表示公司2025年旗下所有電影（包括《One Battle After Another》）都取得豐厚票房回報，今年累計票房收入已超過40億美元。

而事實上，華納兄弟亦係今年首間、亦係唯一一間票房收入超過40億美元嘅電影公司。雖然票房收入唔等於實際利潤，但考慮華納兄弟早前憑《MINECRAFT：我的世界大電影》、《Superman》等電影賺得盆滿缽滿，就算《One Battle After Another》蝕本，對華納兄弟嘅整體影響應該不大。