對於現今世代嘅遊戲界是否應該加價，不論業界定係玩家都已經討論多時，任天堂甚至早已身體力行加價到80美金一隻Game。而預定明年推出嘅《GTA 6》就一直被視為遊戲價格嘅風向標，唔少人都認為《GTA 6》加價，其他人就可以跟住加。不過近來遊戲《黑街聖徒》第一集嘅製作人之一Chris Stockman就提出另外意見：《GTA 6》可以賣到$100美金，但其他人唔好學！

假若《GTA 6》真係加價至$100美金，唔單止會係遊戲史上首隻普通版售價就突破三位數嘅遊戲，更有可能為整個業界拉出更多加價空間。而Chris Stockman於接受《Esports Insider》訪問時，就對呢句話嘅前半部份表示同意。佢認為《GTA6》的確係一隻「$100美金遊戲」，甚至表示「希望佢哋加價到$100美金」，考慮遊戲嘅體量及影響力，「亦真係值得賣到100美金。」

但佢同時強調：「《GTA》係唯一可以咁做嘅遊戲，我唔認為呢個係水漲然後所有船跟住一齊高嘅情況。如果大家都跟住加價，我相信會有極大嘅反彈。唔係所有遊戲都有平等待遇。」

換言之，Chris認為《GTA 6》可以賣到、亦應該要賣到$100美金，因為佢係《GTA》。而其他Game想加價就應該要自己同《GTA 6》比較，無咁大個頭又想戴咁大頂帽，玩家好可能唔會埋單。

但事實上，業界對於《GTA 6》本身會唔會加價都一直抱有疑問。之前就有業界分析師講過，《GTA 6》可以透過推出啲咩特別版、高級版黎提高單價，從忠實Fans手上榨出更多錢。如果走去將普通版嘅售價提高，反而有可能將部份對價格敏感嘅普通玩家拒於門外，對《GTA 6》黎講係得不償失。

資料來源：IGN