近年愈嚟愈多遊戲被改編成影視作品，繼《The Last of Us》、《Fallout》後，今次就輪到人氣爆笑合作煮食遊戲《Overcooked（胡鬧廚房）》。據外媒《Deadline》報導，知名製作公司A24已取得遊戲改編權，並聯同Netflix攜手開發一輯《Overcooked》真人競賽節目！

《Overcooked》由英國工作室Ghost Town Games於2016年推出，以高強度團隊合作及節奏緊湊著稱，玩家需喺時間限制內同隊友一齊準備食材、烹調、上菜、洗碗，同時應付不斷變化嘅關卡同突發狀況（例如地板會裂開、有老鼠偷食材）。由於過程時常出現節奏大亂、互相鬧交又笑到肚痛嘅場面，所以呢款遊戲又被戲稱為「友情破壞game」、「分手廚房」。

消息指，呢輯真人競賽節目將延續遊戲嘅「大混亂」精神，風格類似《Nailed It! 》、《Floor Is Lava》等真人Show節目，主打老少咸宜搞笑競賽。可以預料到參賽者將要喺設計奇特又充滿機關嘅廚房入面煮嘢食，並同時與時間競賽，因而搞出唔少笑料。

值得一提嘅係，今次係A24首次涉足真人競賽節目領域，亦標誌住其版圖已經從以往嘅電影同劇集，擴展至綜藝節目。唔知以製作獨特、風格強烈獨立電影聞名嘅A24拍綜藝又掂唔掂呢？目前節目仍處於早期製作階段，尚未公布主持人、參賽者及播出日期。